Пред малку повеќе од два месеци, Хајко Херлих беше промовиран во тренер на Аугсбург, но поради прекинот на првенството поради пандемијата со корона-вирусот, стратегот немаше можност да дебитира за новиот клуб. Во изминативе 10-тина дена Херлих ги подготвуваше играчите за дуелот против Волфсбург в сабота, но стратегот направи еден непромислен потег и тоа ќе го чини повторно да не може да дебитира на клупата за новиот тим.
Во Германија беше договорено сите клубови да бидат во еднонеделен карантин и да не смее да се прекрши тоа правило. На денешната прес-конференција Херлих призна дека го прекршил карантинот.
„Направив глупава грешка и го напуштив хотелот. Дури иако ги почитував хигиенските мерки и кога одев и кога се враќав, не можам да одречам дека направив нешто што не требаше. Не се поставив како пример за својот тим во јавноста. Затоа и ќе ја преземам одговорноста. Поради грешката која ја направив, нема да можам да го водам тимот на утрешниот тренинг, а нема да бидам ниту на клупата на саботниот меч против Волфсбург“, откри Херлих, кој ќе ја чека наредната серија на тестирања за да се потврди дека не е позитивен на корона-вирусот.
