Белоруската тенисерка Арина Сабаленка се пожали дека со соочува со невидена омраза поради улогата на нејзината земја во руската инвазија врз Украина и дека сето тоа тешко го поднесува.
Втората тенисерка на ВТА ранг-листата и победничка на Отвореното првенство на Австралија, откри дека водела чудни разговори со членовите на тимовите на украинските тенисерки.
„Тешко ми е да го разберам тоа што се случува. Не можам да замислам колку луѓе ме мразат без никаква причина. Јас никому ништо лошо не сум му направила. Можам да ја разберам омразата на социјалните мрежи, но не можам да ја разберам омразата и нетрпеливоста на турнирите. Водев чудни разговори, не само со украинските тенисерки, туку и со членовите на нивните тимови. Мора да научам да ги игнорирам нивните емоции, морам да се фокусирам на себе“, рече Сабаленка.
Украинката Лесја Цуренко се повлече од турнирот од серијата Мастерс 1000 во Индијан Велс, што се играше минатата недела, бидејќи не сакаше да игра против Сабаленка.
Цуренко потоа изјави дека имала напад на паника по разговорот со првиот човек на ВТА, Стив Сајмон, кој ѝ рекол дека нема никакви причини руските и белоруските тенисери и тенисерки да бидат исфрлени од турнирот, како и дека постои можност да настапат на Олимписките игри во Париз идната година.
„Сфатив дека тоа не е моја грешка, дека не ги повредив јас, а сигурна сум дека ниту другите руски и белоруски спортисти не им направиле ништо лошо на Украинците“, додаде Сабаленка, која ќе биде главен фаворит за триумф на Мастерсот во Мајами по повлекувањето на првата светска тенисерка Ига Швјонтек.
Руските и белорусите тенисери и тенисерки имаат право да настапуваат на турнирите како неутрални спортисти и не смеат да носат никакви обележја на нивните земји.
