Екипата на Борусија Дортмунд беше голгетерски расположена, потсети на игрите од првиот дел од сезоната, и со 4-0 славеше на гостувањето кај немоќниот Фрајбург. Со новите три бода, Борусија повторно дојде на еден бод заостанување зад лидерот Баерн Минхен, па во завршните четири кола, ќе се води голема битка за трофејот.
Капитенот Марко Ројс беше најзаслужен поединец за победата.
Ројс најпрвин асистираше до Санчо за 1-0, потоа самиот даде гол, повторно асистираше, до Геце за 3-0, а конечниот резултат го постави Алкасер од пенал. За Ројс, ова беа седма и осма асистенција сезонава, а за споредба, тој во претходните три сезони заедно имаше вкупно седум клучни додавања кои завршија со гол.
Клуч на успесите на Борусија се првите полувремиња. „Жолто-црните“ кога водат по прво полувреме, имаат 52 меча по ред без пораз во Бундеслигата.
Борусија има серија од 16 натпревари по ред без пораз во дуелите со Фрајбург, изедначувајќи го својот рекорд кој го има и против Нирнберг. Фрајбург не е загрозен, но испушти шанса со освојување на бод и теоретски да обезбеди опстанок во Бундеслигата.
