Центарот на Денвер нагетс, Никола Јокиќ испиша историја во НБА лигата на најрадосниот христијански празник. Јокиќ во победата на неговиот тим од 121:108 над Кливленд, го оствари 10-тиот трипл-дабл во сезоната и стана четвртиот играч во историјата на НБА со најмалку 10 вакви достигнувања во шест различни сезони. Тој средбата ја заврши со 28 поени, 15 скокови и 10 асистенции и им се приклучи на Оскар Робертсон, Меџик Џонсон и Расел Вестбрук кои исто така во шест различни сезони оствариле најмалку 10 трипл-дабл.
Денвер е најдобар тим во Западната конференција со скор 26-13, додека Кливленд е четврти на Истокот со 25-15.
Историска вечер имаше и Зек Лавин кој со 41 поен го предводеше Чикаго булс во победата над Филадедија од 126:112. Лавин постигна дури 11 тројки од само 13 шута и стана вториот кошаркар во историјата кој постигнал двоцифрен број на тројки со 80 отсто прецизен шут.
ЛА Лејкерс ја забележа четвртата победа по ред и се приближи до позициите кои носат пласман во плеј-офот.
Последна жртва на Лејкерси беше Атланта која е совладана со 130:114. Леброн Џејмс го предводеше победничкиот тим со 25 поени и 10 асистенции, а одлична партија и прикажаа Кендрик Нан со 23 поени, Денис Шрудер со 21 и Томас Брајант со 19 поени и 13 скокови. Кај Атланта, прво име беше Тре Јанг со 32 постигнати поени.
Лејкерси сега имаат скор 18-21 и се наоѓаат на само две победи од десеттото место во Западната конференција кое носи во разигрувањето за плеј-офот.
Кошаркарите на Бруклин ексресно го заборавија поразот од Чикаго кој им ја прекина серијата од 12 триумфи по ред, и утринава го победија Њу Орлеанс пеликанс со 108:102. Најдобар на теренот беше Кевин Дурент со 33 поени и 10 скокови, додека кај Њу Орленас се истакна Си Џеј Меколум со 28 постигнати поени.
Резултати: Индијана – Портланд 108:99, Филаделфија – Чикаго 112:126, Њу Орлеанс – Бруклин 102:108, Торонто – Њујорк 108:112, Милвоки – Шарлот 109:138, Оклахома сити – Вашингтон 127:110, Сан Антонио – Детроит 121:109, Денвер – Кливленд 121:108, Минесота – ЛА КЛиперс 128:115, Феникс – Мајами 96:104, ЛА Лејкерс – Атланта 130:114.
