Женската фудбалска репрезентација на Бразил ја доби драмата против Колумбија, во финалето на Копа Америка и стана шампион на Јужна Америка. Ова беше најдраматичното финале во историјата, а кариоките имаа повеќе среќа, па на крајот се радуваа на рекордната деветта континентална титула.
По регуларниот дел, резултатот беше 3:3, па мораше да се играат продолженија. Во дополнителните 30 минути, двата тима постигнаа по уште еден гол за 4:4, па мораше пеналите да го решат победникот во финалето. Дури во седмата пенал-рулет серија, Бразил стигна до победа од 5:4, за голема радост и нова титула за најдобра селекција во Јужна Америка.
А, Колумбија има многу за што да жали во ова финале, затоа што три пати водеше, а на крајот не стигна до златото. Колумбија поведе во 25 минута, а Бразил израмни дури во 45+9 минута од првиот дел.
Во второто полувреме, во 69 минута Колумбија стигна до 2:1, но Бразил израмни во 80 минута. Колумбија повторно поведе во 88 минута, а потоа на сцена стапи легендарната Марта. Шесткратната освојувачка на Златна топка, иако има 39 години, покажа дека е најдобра кога е најпотребно. Марта во игра влезе во 82 минута, а даде гол за 3:3 во 90+6 минута и го спаси Бразил од пораз.
Во продолжението два пати по 15 минути, Марта повторно даде гол за Бразил и овојпат Кариоките прв пат поведоа на мечот со 4:3. Тогаш и Колумбија покажа дека знае да се врати од негатива израмнувајќи преку Сантос во 115 минута.
Во пенал рулетот, по седум серии, Бразил победи со 5:4.
