Колумбискиот фудбалер Матеус Урибе беше парично казнет од неговиот клуб Порто поради тоа што на роденденот на жена му останал подолго отколку што му било дозволено од клубот. Интересно е што во Порто за прекршувањето на договорот од страна на Урибе дознале од клипови и фотографии на социјалните мрежи.
„Жал ми е, се извинувам. Само тоа можам да го кажам. Барам од сите да имаат разбирање и да објавуваат информации кои се точни. На мојата сопруга ѝ беше роденден, имавме прослава во петокот со луѓе кои ни се блиски. На полноќ, другите играчи на Порто си заминаа, а јас отидов да се одморам, но забавата продолжи во дворот, затоа велат дека сум останал до 5 часот наутро. Тоа е лага. А, следниот ден немавме ниту тренинг, ниту натпревар. Моето семејство знае дека физичката состојба ми е приоритет и секогаш сум бил професионален“, напиша Урибе на „Инстаграм“.
Но, една слика на Урибе со сопругата Синди Алварес Гарсија,ж покажува дека тие двајца биле заедно 20 минути по полноќ и не е точно дека тој си легнал на полноќ. Од Порто, фудбалерите имале наредба да си легнат во 23 часот. Не само тоа, туку и на клипови се гледало дека играчите се забавуваат и тоа било во 5 часот наутро.
