Хрватската фудбалска репрезентација го освои третиот медал на големи натпреварувања во последните пет години. За нивна жал, ниеден од тие три медали не е со злато. По среброто на Светското првенство во Русија 2018 година и бронзата од лани на Мундијалот во Катар, сега Коцкестите се сребрени и во Лигата на нациите.
Во финалето, Хрватска на пенали загуби од Шпанија со 5:4, и тоа дури по шест серии на пенали.
„Тажни сме, но и горди. Горди на оваа репрезентација, на играчите кои направија важна работа. Им реков дека мора да бидат горди за сè што направија во овие пет години. Успеаја во туѓа земја да доведат 35.000 Хрвати да навиваат. Тоа е најголем број Хрвати кои дошле во странство на еден фудбалски меч“, вели Далиќ, кој сакаше да се коригира за тоа што го кажа веднаш по вчерашното финале.
„Синоќа погрешив кога реков дека пеналите се лотарија. Не се лотарија, тоа е ментална снага, квалитет. За жал, Шпанците во тоа беа подобри од нас. Мислам дека на теренот направивме сè што требаше. Жал ми е за сите, но посебно ми е жал за Лука Модриќ затоа што по сè што направи за селекцијата, заслужи да освои едно злато“, коментираше Далиќ по враќањето во Хрватска.
