Директорот на италијанскиот Удинезе, Пјерпаоло Марино, даде изјава која предизвика големо внимание во Европа. Тој најавува дека Премиер лигата во Англија ќе биде прекината поради сериозната ситуација со Коронавирусот. Марино е во постојан контакт со семејството Поцо, кое поседува најголем дел од акциите во клубовите Удинезе и Ватфорд.
„Во Белгија веќе ја откажаа сезоната и покрај заканите од УЕФА, а наскоро и англиската Премиер лига ќе излезе со слично соопштение бидејќи ситуацијата е многу сериозна. Се надевам дека по Коронавирусот ќе можеме да уживаме во фудбалот. Колку и да сме без фудбал, нема врска, важно е да се вратиме во нормала. Загрижен сум и за следната сезона, не само за оваа“, рече Марино.
Белгија прогласи првак и крај на сезоната, но откако УЕФА им кажа дека нивните тимови нема да може да играат во Лигата на шампионите и Лигата на Европа, ќе ја преиспитаат одлуката. И англиските клубови сакаат сезоната да се доигра и со тоа да се ублажат загубите, па затоа изјавата на Марино треба да се земе со резерва.
Ватфорд е во опасната зона, затоа и треба да чуди што семејството Поцо се залага за поништување на сезоната. Ватфорд на тој начин би останал во елитното друштво и не би испаднал.
