Смената на тренерската позиција не донесе многу новини во таборот на Милан по отворањето на новата сезона во Серија А. Росонерите го загубија првиот меч под водство на Марко Џампаоло, на гостувањето кај Удинезе, во дуелот кој ќе се памети како официјално деби за Илија Несторовски во дресот на Зебрите.
Минималниот резултат од 1-0 во корист на домаќините, значеше дека Милан ќе претрпи петти пораз на отворањето во изминативе осум сезони. Иако се очекуваа големи промени по заминувањето на Џенаро Гатузо, ниту новиот стратег не може веднаш да го претвори овој тим во фудбалска сила каква што некогаш беше Милан.
Особено потфрли нападот, кој се состоеше од Пјонтек, Кастилјехо и Сусо. Џампаоло се обиде со различна формација да се закани кон голот на Удинезе, но поставеноста на играчите не донесе никаков резултат бидејќи шпанските фудбалери играа надвор природните позиции. Пјонтек не дојде до посериозна шанса да упати удар во рамките, па Милан го заврши мечот без шут во рамките од голот на Мусо.
Катастрофалната статистика е доказ дека Џампаоло го чека уште многу работа да го врати седумкратниот европски првак на старите победнички патеки.
