Реал Мадрид минува низ еден од најтешките периоди во последните години, со сериозни проблеми поради повредите на играчите. Тимот досега забележа 24 повреди од почетокот на сезоната. Освен тоа, Едер Милитао повторно сериозно го повреди коленото и ќе биде надвор од терените до крајот на сезоната.
Слично е и со Давид Алаба, кој исто така долго е повреден, а и Дани Карвахал ќе биде отсутен цели 10 месеци.
Според правилата на Ла Лига, Реал Мадрид има право да ангажира замена во случај на сериозна повреда на играч, и многу навивачи на Реал Мадрид на социјалните мрежи го бараат враќањето на поранешниот капитен и легенда на клубот, Серхио Рамос.
Рамос, кој е слободен играч откако ја напушти Севиља, одби понуди од Саудиска Арабија и моментно тренира индивидуално, чекајќи добра понуда.
Еден од најпознатите поранешни играчи на Реал, Гути, во изјава за мадридските медиуми истакна дека би го вратил Серхио Рамос веднаш, сметајќи дека тоа е најлогичното решение во моментот.
Враќањето на Рамос би можело да биде корисно за Реал Мадрид до јануари, кога претседателот Флорентино Перес ќе може да се обиде да доведе ново име.
