Екипата на Феникс ќе игра во финалето на Купот на Македонија, откако во неизвесен меч го победи Пелистер со 86:79. Во утрешното финале Феникс ќе игра против МЗТ Скопје Аеродром.
Пред почетокот на полуфиналето, Пелистер беше фаворит, но на теренот се покажа дека тоа не е пресудно. Битолчани кои имаат четири победи во петте средби со овој ривал, вечерва беа немоќни во клучните моменти, па затоа Феникс ќе игра во финалето за трофејот.
Почетокот на мечот беше израмнет, а по водството на Пелистер од 16:15, следуваше серија од 11:1 за Феникс, па скопскиот тим по првите 10 минути водеше со 26:17. На почетокот од втората четвртина Феникс продолжи да игра добро и имаше предност од 37:21.
Сепак Пелистер не се предаде и пред крајот на полувремето стигна само на еден негатива (45:44), а на полувреме Фенкс водеше со три разлика. Во текот на третата четвртина, во ниту еден момент водството за еден од двата тима немаше повеќе од четири поени предност.
Во последната четвртина резултатот беше 72:72, а во завршницата Феникс беше подобар. Скопскиот тим поведе со 76:72, потоа и со 81:76, што беше доволно на крајот да стигнат до триумф и место во финалето.
Трајковски и Хот беше дуото кое го предводеше Феникс до победата. Хот имаше 18 поени и 10 скока, а Трајковски заврши со 18 поени и 13 скока. Кај поразениот тим најпрецизен беше Хаџифезовиќ.
