Кога Чаби Алонсо пристигна во Мадрид ова лето, многумина го гледаа како долгорочно решение на клупата на Реал Мадрид.
По помалку од една година, Реал веќе ја разгледува замената за него, Алваро Арбелоа, кој не ги исполни очекувањата, иако имаше неколку одлични настапи, како двомечот против Манчестер сити во осминафиналето на Лигата на шампионите.
Она што е особено интересно и денес се провлекува низ мадридските медиуми е фактот дека Арбелоа сега има повеќе порази на клупата на Реал отколку Чаби Алонсо. Дополнително, тој има водено осум натпревари помалку од својот поранешен соиграч од Ливерпул и Реал Мадрид.
Чаби Алонсо седеше на клупата на Реал на 34 натпревари и запиша шест порази, додека Арбелоа има седум порази на 22 натпревари.
Сето тоа доаѓа во момент кога Реал е без победа на четири последовни натпревари (Мајорка, Баерн, Жирона, Баерн), што на мадридскиот клуб не му се случило од септември 2018 година.
Тогаш на клупата беше Хулен Лопетеги, кој набрзо потоа доби отказ.
Како што стојат работите, Арбелоа наскоро би можело да бара нов ангажман, можеби и ќе остане во Реал, но не во првиот тим.
За негов наследник сега најмногу се споменува името на Маурисио Покетино, актуелниот селектор на фудбалската репрезентација на САД, кој во минатото со успех ги предводеше Тотенхем и ПСЖ.
