Ги украдоа корнер знаменцата од „Олд Трафорд“, па гордо ги покажуваа низ Манчестер (Фото)
Фановите на Јунајтед вчера предизвикаа хаос, а порачаа и дека тие ќе одлучат кога да се игра дербито со Ливерпул.
Протестите на навивачите на Манчестер јунајтед кои влегоа на стадионот „Олд Трафорд“ и ја шокираа светската јавност, предизвикувајќи одложување на дербито со Ливерпул, дефинитивно излегоа од контрола, беше повреден и еден човек од обезбедувањето, а фановите се чувствуваа толку силни што украдените корнер знамиња од стадионот, гордо ги шетаа низ улиците на градот.
Има фотографии на кои се гледа како навивачи се фалат со „пленот“, а освен корнер знамињата, беа украдени и топки.
Протестите беа насочени против сопственикот на клубот, американскиот бизнисмен Глејзер, но вакво нешто никој не очекуваше дека е можно да се случи во Манчестер. Засега нема официјална одлука кога ќе се игра дуелот помеѓу Црвените ѓаволи и Ливерпул. Потребна е целосна дезинфекција на стадионот и преземање на строги безбедносни мерки како гаранција дека нема да има никакви инциденти.
