Новак Ѓоковиќ продолжува со блескави игри на Отвореното првенство на Австралија и денеска со лесни 3:0 во сетови го победи Андреј Рубљов за пласман во полуфиналето на првиот гренслем-турнир сезонава. Во полуфиналето, Србинот ќе игра против Томи Пол, кој е првиот Американец со место во полуфиналето на турнирот во Мелбурн по пауза од 14 години.
Ѓоковиќ против Рубљов немаше никакви проблеми и за малку повеќе од два часа си обезбеди место во полуфиналето, и тоа по јубилеен 10-ти пат. Популарниот Ноле секојпат кога стигнувал до полуфиналето, на крајот бил и шампион во Мелбурн.
Во првиот сет беше 1:1 во гејмови, а потоа Ѓоковиќ со фуриозна игра освои пет гејма по ред и стигна до 6:1. Малку подобар беше Рубљов во вториот сет кога „држеше“ до 2:2, а потоа повторно следуваше шоу на Ѓоковиќ за 6:2. На почетокот на третиот сет, фаворитот направи брејк и до крајот на сетот рутински ги доби сите свои сервиси за конечни 6:4.
The moment Djokovic took every last bit of Rublev's soulpic.twitter.com/ji4prZyqGM
— Bastien Fachan (@BastienFachan) January 25, 2023
За Ѓоковиќ ова беше 26-та победа по ред на Отвореното првенство на Австралија, со што постави свој личен рекорд, а се израмни со постигнувањето на Андре Агаси.
