Потенцијалниот македонски репрезентативец, Никола Ѓорѓев повторно ќе игра за Арау и потпиша двегодишен договор со швајцарскиот второлигаш.
Ѓорѓев кој има пет настапи за А селекцијата на Македонија и е член на златната генерација македонски младинци со настапи на ЕП во Полска во 2017 година пред четири години играше за Арау и сега пак се враќа во истиот клуб.
„Добро го познаваме Никола, тој е одличен офанзивец со непредвидливи решенија во играта и може да го забрза ритамот на Арау. Целта ни е да влеземе во Првата лига и очекуваме Ѓорѓев да ни помогне да ги реализираме амбициите“, изјави спортскиот директор Сандро Бурки.
Ѓорѓев има 24 години и е роден во Цирих, Швајцарија, но игра за нашата репрезентација, а беше член и на младинската селекција до 21 година, која прва настапи на големо натпреварување.
На ЕП во Полска во 2017 година, Ѓорѓев беше стрелец на еден од четирите голови на Македонија и погоди во Бидгошч против Србија на меч што заврши 2:2.
Досега има играно за Грасхоперс, Арау, Твенте и Шафхаузен, а сега ќе се обиде повторно во Арау.
