Гонзало Игуаин се повлече од репрезентацијата на Аргентина, напаѓачот на Челзи во својата кариера запиша 75 настапи за „гаучосите“ во кои постигна 35 погодоци. Тој смета дека е време да го отстапи местото на помладите, а во последната репрезентативна пауза не беше повикан од страна на селекторот Скалони.
Триесет и едногодишниот фудбалер своето деби за Аргентина го запиша во октомври 2009 година против Перу за мундијалските квалификации и во првиот меч забележа погодок. Последен пат сино-белиот дрес го носеше во победата над Нигерија со 2-1 во групната фаза од СП, кое се одржа во Русија минатата година.
„Сметам дека е вистинско време да се повлечам од репрезентацијата. Сакам поголемиот дел од слободното време да го посветам на семејството, како и во добро светло да ја завршам сезоната со Челзи. Премиер лигата е неверојатна и мило ми е што секој викенд учествувам во неа. За Аргентина секогаш играв со полно срце и дадав сè од себе“, истакна Игуаин.
Аргентинецот по пристигнувањето во Лондон настапи на 10 меча во сите натпреварувања за „сините“ и постигна три погодоци. Викендов Премиер лигата се враќа на сцената, а Челзи гостува кај Кардиф (недела, 15:05 часот) во рамки од 32-рото коло.
