Европското првенство во фудбал речиси сигурно нема да се одржи ова лето, како што беше планирано од 12 јуни до 12 јули, но не е исклучено да се игра во оваа календарска година. Според англиски медиуми, во вторник на состанокот на УЕФА на маса ќе бидат два предлози: ЕП да се одложи за следната 2021 година, или за декември 2020.
Првата опција се појави деновиве, а проблемот е што во летото 2021 треба да има проширено Светско клупско првенство, па ќе треба дозвола и од ФИФА, која ќе мора да смисли што со тоа натпреварување. Проблемот за варијантата декември 2020 е што ќе треба да се прекине клупската сезона и постои ризик од повреди, а тука е и студеното време, особено во Русија која е една од 12-те земји домаќини.
ЕП мора да се игра бидејќи ако се откаже, ќе има многу тужби од спонзорите кои имаат договор со УЕФА.
Во вторник и македонската јавност е во исчекување, треба да се донесе одлука каква ќе биде судбината на баражот од Лигата на нации. Ако ЕП се одложи за декември, против Косово ќе се игра летово или наесен.