Еден од оние кои треба да бидат лидери на теренот на италијанската репрезентација е капитенот Чиро Имобиле. Искусниот 33-годишен напаѓач има постигнато 16 голови во националниот дрес во 56 средби кои ги има одиграно. Имобиле вели дека неговиот тим утре во Скопје, не треба да го повтори киксот од пред една и пол година, кога Аѕурите со 0:1 загубија од Македонија во Палермо.
„Кога го облекувам националниот дрес, тоа секогаш има посебна тежина за мене. Не дека тој дрес вреди повеќе од клупскиот дрес, но тоа е дрес кој ги преставува сите клубови. Пред нас е едно сосема ново искуство затоа што започнавме да работиме со нов селектор, од кого може многу да се научи. Последен пат кога игравме против Македонија тоа беше многу деликатен момент за нас. Тогаш бевме многу нервозни и затоа загубивме. Македонија има силен тим со фудбалери кои играат во добри клубови. Елмас е исклучително добар фудбалер, многу добро го познавам неговиот квалитет“, рече Имобиле,
Капитенот на Италија не заборави да ја потенцира лошата состојба на теренот на арената „Тодор Проески“.
„Теренот е многу лош. Има многу дупки и ќе биде тешко да се игра“, вели Имобиле.
