Хрватската тениска легенда Горан Иванишевиќ кој му беше тренер на Новак Ѓоковиќ, смета дека 38-годишниот Србин уште има шанса да ја освои својата 25-та грендслем титула.
Ѓоковиќ не освоил гренслем од 2023 година наваму. На неодамнешниот Австралија опен, Новак го победи вториот светски тенисер, Италијанецот Јаник Синер во полуфиналето, а потоа загуби од Карлос Алкараз во финалето.
„Дали Ѓоковиќ може да го освои 25-тиот гренслем? Да не работев со него, можеби ќе речев не. Но, познавајќи го, зборовите „невозможно“ и „не може“ не се во неговиот речник. Секако, можно е. Многу луѓе се прашуваат од каде ја наоѓа мотивацијата да продолжи да се натпреварува. Слушам некои таканаречени експерти како постојано го отпишуваат. Не знам дали навистина го разбираат тенисот. Ѓоковиќ игра затоа што сака да се натпреварува, да биде на теренот и да победува. Само погледнете колку турнири играше минатата година, тој сè уште е трет во светот. Новак е посебен, најголемиот тенисер на сите времиња и никогаш не треба да се отпишува“, рече Иванишевиќ во интервју за „Спортклуб“.
