Шпанија е на прагот да не успее да се пласира во полуфиналето од Лигата на нации. Тоа е така бидејќи „црвената фурија“ игра многу несигурно посебно во одбраната. Дефанзивниот ред дефинитивно е најголемиот проблем. Тоа се покажа и на последните два меча од Лигата на нации, кога Шпанија прими вкупно шест гола во дуелите со Англија и Хрватска.
Како еден од најголемите виновници за овие неуспеси, секако е голманот Давид де Хеа. Чуварот на мрежата прими три гола за само едно полувреме против Хрватска и по тој пораз, Шпанија се најде во незавидна ситуација. Сега, „црвената фурија“ ќе го чека исходот од денешниот дуел меѓу Англија и Хрватска на „Вембли“. Доколку има победник на овој дуел, Шпанија ќе извиси, а секако Де Хеа ќе биде еден од виновниците.
Весникот „Ас“ направи анкета за тоа кој треба да го замени Де Хеа. Дури 50 отсто од гласовите биле за легендарниот Икер Касилјас. Голманот кој има 167 настапи за националниот тим, сега повторно може да се врати како прва опција. Зад Касилјас е Кепа со добиени 40 отсто од гласовите. Сите останати голмани се со едноцифрена поддршка.
