Кил го освои третото место на завршниот ракометен Ф4 турнир во Лигата на шампионите во Келн. „Зебрите“ во германскиот дуел беа подобри од ланскиот шампион Магдебург победувајќи со 32-28.
Кил многу подобро го одигра првото полувреме од натпреварот, што беше клучен фактор за конечниот триумф. Тимот на Филип Јиха создаде предност од девет гола (23-14) по првите 30 минути.
Магдебург во вториот дел се обиде да намали, но, сепак, негативата беше преголема за да стигне и до пресврт.
Голманот Томаш Мрква имаше 15 одбрани кај победничкиот тим, а Јохансон беше стрелец на седум гола.
Во финалето на ЛШ во ракомет, од 18 часот, во Келн се среќаваат Барселона и Алборг, а мечот ќе го суди македонската двојка Ѓорѓи Начевски и Славе Николов.