Интер ќе се обиде да ги искористи проблемите во таборот на Ливерпул во претстојниот натпревар меѓу двата тима во Лигата на шампионите. Ова е натпревар од шестото коло на главната фаза, а пред него Италијанците имаат три бода повеќе.
Голем дел од вниманието е насочено кон тензиите во Ливерпул помеѓу Мохамед Салах и тренерот Арне Слот.
„Сите знаеме какво значење има Салах за светскиот фудбал и што придонесе за играта“, започна тренерот на Интер, Кристијан Киву.
„Но тоа не ме загрижува. Ливерпул има многу квалитетни играчи кои можат да играат и без Салах. Нивото на тимот останува високо, ова е колектив, не станува збор само за еден играч. Треба да се фокусираме на тимот како целина.“
„Ливерпул го претвори интензитетот во свој слоган“, продолжи Киву. „Јирген Клоп го воведе, а Слот се обидува да го одржи. Тие ја освоија Премиер лигата, започнаа добро, но имаа и тешки моменти. Ова е еден од најреномираните тимови во светот, создаден за такви големи натпревари. Имаат индивидуална класа, но и колективна. Ние сакаме да играме со иста динамика. Но, тие имаат своја историја и култура, тоа се раѓа од начинот на кој се доживува фудбалот во Англија. Не е подобро или полошо, туку различна фудбалска култура“, истакна тренерот на Интер.
„Можеме ли да ја повториме агресивноста од натпреварот против Комо? Сè е можно, но зависи од енергијата. Не е лесно да се притиска на овој начин на секои три дена. Не се жалам, тоа е реалноста. Треба да се знае кога да се одмори. Притисокот мора да биде со јасни идеи и без губење на балансот. Понекогаш и јас морам да направам пауза и да дишам. Да се игра 20 минути со постојано притискање не е лесно, прашајте го Маркус Тюрам, тој прв мора да го направи тоа. Потребен е компромис“, заврши Киву.
