Македонската фудбалска репрезентација утревечер може да го загарантира првото место во својата група во Лигата на нациите. Со освојување на првото место, Македонија ќе се избори за полуфинале од плејофот за пласман на завршницата од Европското првенство во 2020 година.
Ако успешно се помине групната фаза, следен противник на избраниците на селекторот Игор Ангеловски ќе биде една од трите преостанати репрезентации кои ќе завршат како првопласирани во своите групи од Сегментот Д во Лигата на нациите.
Иако има уште мечеви да се играат, полека се издвојуваат фаворитите и во останатите групи. Грузија и Македонија се единствени со максимални 9 бода и не би требало да има проблеми да биде првопласирана. Белорусија е прва во својата група, а вечерва на домашен терен ако ја победи Молдавија, ќе биде и многу блиску до посакуваната цел. Луксембург во оваа група има 6 бода.
Косово е лидер во својата група, која е единствена со четири одиграни кола. Најновиот член на УЕФА има две победи и две ремија и со 8 бода е пред Азербејџан, кој има 6, а Фарски Острови е со 4 бода.
