Леброн Џејмс ќе го памети гостувањето кај Филаделфија по две работи, едната добра, а другата лоша. Ѕвезда на Лос Анџелес стана кошаркарот со најмногу минути поминати на теренот во историјата на НБА. Леброн како НБА-кошаркар има одиграно 66.298 минути и го сруши неколкудеценискиот рекорд на Карем Абдул-Џабар, кој како НБА-играч на теренот поминал 66.297 минути.
LeBron has played the most minutes in NBA history passing Kareem Abdul-Jabbar (66,298).
38-years-old and still going 👑 pic.twitter.com/TgowlgWtwX
— Yahoo Sports (@YahooSports) November 28, 2023
Во натпреварот на кој стана апсолутен рекордер по бројот на одиграни минути, Леброн го претрпе и најтешкиот пораз во кариерата. Филаделфија немаше милост против ЛА лејкерс и на крајот победи со неверојатни 44 поени разлика (138:94). Беше 13:13, а потоа домаќините со низа од 19:4 стигнаа до високо водство од 32:17 во првата четвртина.
Филаделфија водеше со 15 разлика на полувремето (68:53), а во последната четвртина се влезе со подносливи 98:80. Играта на Лејкерс целосно се распадна во последните 12 минути, кои домаќините ги добија со неверојатни 40:14 и на крајот тимот од ЛА загуби со убедливи 44 разлика, што е најтежок пораз во кариерата на Леброн Џејмс.
Филаделфија на овој меч постигна 22 тројки, а најдобар кај победничкиот тим беше Ембид со трипл-дабл од 30 поени, 11 скока и 11 асистенции. На спротивната страна Џејмс даде 18 поени и беше најефикасен во поразениот тим, а неверојатно е дека тој немаше ниту еден скок. Ова е само третпат во кариерата Џејмс да нема ниту еден скок. Претходно тоа му се има случено само во 2004 година како играч на Кливленд во дуел против Јута, како и во 2010 година, кога го носеше дресот на Мајами во дуел против Вашингтон.
Резултати од мечевите одиграни ноќеска во НБА лигата: Детроит – Вашингтон 107:126, Индијана – Портланд 110:114, Филаделфија – ЛА лејкерс 138:94, Јута – Њу Орлеанс 114:112, ЛА клиперс – Денвер 104:113.
