Фрапантно делува податокот дека поранешниот двоен европски вицешампион Валенсија одигра два меча без притоа да шутне кон голот.
Или цели 180 минути, плус судиските продолженија против Еибар и Вилјареал на Лилјаците им минаа без офанзива и директен удар кон голот на ривалите.
Тоа е огромно изненадување ако се знае дека Валенсија има светска класа офанзивци, дел од нив членови на шпанската репрезентација или потенцијални репрезентативци што вредат заедно стотици милиони евра.
Родриго Морено, кој е член на шпанската репрезентација, беше цел на Реал Мадрид и е проценет на околу 100 милиони евра, но беше премногу тивок против Еибар и во локалното дерби со Вилјареал вчера.
Карлос Солер и Гонкало Гуедеш исто така се многу ценети офанзивци, а со нив и со Родриго потфрли еден од најбараните млади играчи на европскиот пазар, Феран Торес.
За него има интерес од неколку гиганти, а Валенсија бара отштета од 100 милиони евра. Феран лани со два гола во финалето на Европското првенство за играчи до 19 години ѝ ја донесе и титулата на Шпанија, по триумфот против Португалија, а блескаше во првиот дел од сезоната и во Ла Лига.
Но, сега и тој и сите останати офанзивци на популарните Лилјаци играат мизерно, а ако продолжат во ист стил, тешко дека Валенсија ќе игра во европските купови во следната сезона.
На шест кола до крајот на првенството, Валенсија е на осмото место, кое не води во Лигата на Европа и многу брзо и треба да се разбудат напаѓачите и со голови да го прекинат изненадувачкиот пост од два меча без директен удар кон голот на ривалите.
Следниот предизвик е сериозен, а Валенсија ќе мора да атакува на победа против Атлетик Билбао, задутре на „Месталја“ во меч против тим што им е конкурент за позициите што водат во Европа.
