Договорот на Лука Модриќ со Реал Мадрид истекува по Светското клупско првенство кое летово ќе се одржи во САД. Желбата на Хрватот е да остане во Мадрид уште една сезона, но последниот збор го има Флорентино Перес, кој треба да одлучи дали уште еднаш ќе си подаде рака за нов едногодишен договор.
Два клуба од американската МЛС-лига се во игра за потписот на Модриќ, Њујорк сити и Лос Анџелес, и тоа ќе биде неговата дестинација по Реал Мадрид. Сепак, сè ќе зависи од Кралевите дали Хрватот веднаш по Светското клупско првенство ќе остане во САД или тоа ќе се случи по Мундијалот во 2026 година.
Извесно е дека САД ќе биде последната станица за Модриќ во неговата богата кариера, но последниот збор за градот каде што ќе игра ќе го има неговото семејство, кое треба да одлучи помеѓу двата најголеми града во САД.
