Македонија може да игра со Германија во март во трите термини од квалификациите за настап на Мундијалот во Катар и во тој случај четирикратниот светски првак против нас би го предводел актуелниот селектор Јоаким Лев, а во сите преостанати варијанти првиот фаворит во нашата група ќе има нов стратег.
Германците не го сменија Лев и по дебаклот од Шпанија од 0:6 во меч од Лигата на Нации, но му дадоа само уште една шанса да биде селектор на една од најмоќните фудбалски нации на големо натпреварување.
Договорот е Лев да селекторува уште на Европското првенство во јуни и јули идната година и потоа да си замине.
Тоа е интересна варијанта и за Македонија, па Лев би бил селектор против нас, само ако играме со Германците во три термини во март идната година во квалификациите за СП 2022.
Првото коло во групата Ј е закажано за 24-25 март, само три дена подоцна на 27-28 март се игра втората рунда, а уште три дена подоцна и третото коло.
Потоа квалификациите продолжуваат со три термини во септември 2021 година, два во октомври и два во ноември.
Распоредот на натпреварите во нашата квалификациска група за пласман на Мундијалот во Катар дополнително ќе бидат одредени, што значи дека против Германија со Лев како селектор би играле само во март на почетокот на квалификациите.
Се најавува дека има четири кандидати за наследници на Лев на кормилото на Германија, а најсериозен е Јирген Клоп, но тој не може да биде селектор пред 2023 година, кога му истекува договорот со Ливерпул.
Втор кандидат е Ралф Рангник, моментно на привремена работа во Бразил во Брагантино. Се шпекулира дека и Ханси Флик е можен кандидат за нов селектор на Германија, но тоа е помалку веројатна варијанта.
Иако се споменува како последен, најмногу шанси да го наследи Лев на кормилото на Елфот има Штефан Кунц, сегашниот селектор на младата селекција на Германија за играчи до 21 година.
Интересна варијанта би била Македонија да игра со Германија во еден од трите термини во март идната година со Лев како селектор на првиот фаворит во нашата група и потоа вториот меч подоцна во терминиите во септември, октомври, или ноември со нов стратег на кормилото на четирикратниот светски првак.
Термини за квалификациските мечеви на патот до Мундијалот во Катар 2022:
- КОЛО – 24–25 март 2021
- КОЛО – 27–28 март 2021
- КОЛО – 30–31 март 2021
- КОЛО – 1–2 септември 2021
- КОЛО – 4–5 септември 2021
- КОЛО – 7–8 септември 2021
- КОЛО – 8–9 октомври 2021
- КОЛО – 11–12 октомври 2021
- КОЛО – 11–13 ноември 2021
- КОЛО – 14–16 ноември 2021
Бараж натпревари во случај Македонија да биде втора во Ј групата:
24, 25, 28, 29 март 2022 година
