Данскиот напаѓач Расмус Хојлунд (22) го напушта Манчестер Јунајтед за да ја продолжи кариерата во Наполи. Станува збор за позајмица со опција за откуп, а постигнат е договор меѓу клубовите. Фабрицио Романо потврди дека клубовите постигнале усмен договор Хојлунд да се приклучи на тимот на Антонио Конте.
„Расмус Хојлунд во Наполи, еве го! Постигнат е усмен договор меѓу сите вклучени страни. Позајмица за надомест од 6 милиони евра со задолжителна клаузула за откуп под одредени услови, во вредност од 44 милиони евра. Хојлунд се согласи да се приклучи на Наполи пред неколку дена, подготвен за медицински прегледи во следните 24 часа“, напиша Романо.
Хојлунд дојде на „Олд Трафорд“ од тимот на Аталанта во летниот преоден рок во 2023 година за сума од 83 милиони евра, но не ги оправда очекувањата. Тој постигна само осум гола во 40 настапи под водство на менаџерот Рубен Аморим минатата сезона. Иако Данецот сакаше да се бори за своето место во тимот, по доаѓањето на Бенџамин Шешко, беше јасно дека ќе мора да си бара нов клуб, а Наполи тоа го искористи и го доведе во своите редови и тоа како замена за повредениот Ромелу Лукаку.
