Да продолжи победничката серија на домашен терен е единствената намера на кошаркарите на МЗТ Скопје Аеродром во пресрет на средбата со Сплит од 18 часот во рамките на шестото коло од втората АБА-лига.
„Штрковите“ одлично ја стартуваа сезоната, но потоа имаа серија непосакувани случки, па пресметката со сплитските „жолти“ може да биде прилика за стабилизирање на составот на тренерот Ѓорѓи Кочов.
„Сплит има одличен состав, играат добро. Очекувам голема борба. Ако бидеме максимално мотивирани и храбри, верувам дека можеме да дојдеме до победа. Секако, верувам дека ќе имаме помош од верната публика. Ќе треба да го подигнеме нивото на одбрана, како на првите мечеви од АБА 2 лигата“, вели Кочов.
Влезот во „Јане Сандански“ е слободен, а на повеќе места во салата ќе бидат поставени кутии за донација за лекување во странство на Борче Цветановски, татко на член на навивачката група „Фемили“.
