Кошаркарите на Минесота тимбервулвс се пласираа во финалето на Западната конференција откако без поголеми проблеми ја „исчистија“ екипата на Голден стејт Вориорс во серијата.
Минесота игра фантастично во плејофот, а тоа го демонстрираше и во серијата против Голден стејт, во која славеше со 4-1 и заслужено се пласира во финалето на Западната конференција.
Минесота тимбервулвс покажа зошто е меѓу фаворитите за освојување на НБА-титулата, а конечниот удар на ривалот го зададе синоќа, во петтиот натпревар, во кој победи со 121-110.
Vibes are HIGH for Minnesota 🕺 https://t.co/0bECc532uI pic.twitter.com/Ql3dWyYK2g
— NBA (@NBA) May 15, 2025
Домашниот тим имаше предност од самиот почеток на натпреварот, која не ја испушти до крај, а таа континуирано растеше со секој напад.
На полувремето резултатот беше 62-47 за домашните, а по третата четвртина Минесота водеше со 93-72, па беше јасно дека патот кон финалето е веќе осигуран. Единствено што успеа да направи Голден стејт беше да ја намали предноста, но на крајот Минесота победи со 121-110.
Минесота до победата ја водеше Рендл, кој натпреварот го заврши со 29 поени, осум скокови и пет асистенции, а се истакна и Едвардс со 22 поени, 12 асистенции и седум скокови.
Во редовите на Голден стејт најефикасен беше Подземски со 28 поени, а два помалку постигна Куминга.
Одличен натпревар синоќа одиграа и Бостон селтикс и Њујорк никс, кои продолжија со драмата во оваа серија. На крајот Селтикс победија убедливо со 127-102 и поведоа со 3-2 приближувајќи се до пласман во финалето на Источната конференција.
Бостон до победата го водеше Вајт со 34 поени, а се истакна и Браун со 26 поени, 12 асистенции и осум скокови.
Кај Њујорк никс најефикасни беа Харт со 24 и Брансон со 22 поени.
Минесота во финалето на Западната конференција го чека подобриот од дуелот Оклахома – Денвер (3-2), додека на Истокот веќе е позната Индијана, која го победи Кливленд со 4-1 во серијата.
