Фиорентина му врачи отказ на Винчензо Монтела, па најде експресна замена во Џузепе Јачини. Поранешниот предводник на Емполи ќе ги води Виолетовите до крајот на оваа сезона, а негова задача ќе биде да го извади тимот од кризата во која се наоѓа.
Аеропланино не се задржа долго на клупата на Фиорентина. Дојде во април и успеа да го спаси клубот од испаѓање во Серија Б во последното коло од минатата сезона, додека сега екипата од „Артемио Франки“ повторно е во опасност да се бори за опстанок. Во последните седум кола Фиорентина претрпе пет порази и двапати ремизираше, па затоа се наоѓа на 15-тата позиција на табелата со само 17 бода.
За Монтела ова е трет отказ за помалку од две години, шут-карта претходно доби во Милан, а потоа и Севилја.
Јачини е поранешен фудбалер, кој одигра повеќе од 120 натпревари во виолетовиот дрес во периодот од 1989 до 1994 година. Цела тренерска кариера ја помина во родната земја, а Фиорентина му е 14-ти клуб што ќе го води.
