На денешен ден во 2002 година, Денис Бергкамп постигна неверојатен гол во дресот на Арсенал против Њукасл. Еден од најголемите холандски фудбалери на сите времиња ја прими топката од Роберт Пирес, со маестрална пируета го измами дефанзивецот Никос Дабизас, кој заврши на тревникот, а потоа рутинирано го совлада Шеј Гивен.
Овој потег на Бергкамп беше избран за најдобар гол во историјата на Премиер лигата.
„Неверојатен гол. Чест ни беше што го видовме во живо. Вакви голови ретко се гледаат“, изјави тогашниот менаџер на Арсенал, Арсен Венгер.
Менаџерот на Њукасл, Сер Боби Робсон, истакна дека никој од неговиот тим не може да биде виновен што Холанѓанецот направи таков магичен потег.
Многумина подоцна се обидоа да постигнат сличен гол, но никој не успеа да го надмине Бергкамп.
„Неколку дена не го гледав тој гол, но луѓето постојано ми приоѓаа и зборуваа за него. Тогаш си помислив – Ок, морам да го видам. Го погледнав и сфатив зошто сите ме прашуваат за него. Како ми дојде таа идеја? Едноставно, како и многу работи во фудбалот – одлучив инстинктивно во последниот момент“, се присети Бергкамп на своето маестрално фудбалско дело.
