Кошаркарскиот клуб МЗТ Скопје Аеродром донесе одлука да не се наплаќаат влезници за натпреварот од АБА-лигата в петок и ги покани сите љубители на кошарката да му помогнат на тимот да победи против Цибона и со тоа да дојде на чекор од избегнување на директно испаѓање од јадранската лига.
„Нашите момци в петок (14 април), против Цибона (18 часот) го играат последниот меч од регуларниот дел од сезоната во АБА, во кој победата е задолжителна за да останеме во игра за опстанок во јадранската елита. За такво нешто ќе ни биде потребна вашата помош од трибините. Ова е идеална можност да покажеме колку е голема симбиозата помеѓу Аеродром и МЗТ Скопје Аеродром, но и колку останатиот дел од градот и од Македонија веруваат и уживаат во настапите на сино-белите кошаркари.
Затоа на Велики петок сите патишта нека водат кон ‘Јане Сандански’. Трибините нека бидат исполнети до крај и нека ечи песната на нашите навивачи. Заедно секогаш сме посилни, а сплотени секогаш победуваме! Ова нека биде спектакл во предвечерјето на големиот празник Велигден, голем хепенинг со заедничка радост на крајот.
ВЛЕЗОТ Е БЕСПЛАТЕН!“, објавија од клубот.
