Германскиот кошаркар Денис Шредер беше жртва на расистички навреди за време на натпреварот против Литванија на Европското првенство, одигран во финскиот Тампере. Дел од литванските навивачи упатиле мајмунски довикувања кон Шредер, по што обезбедувањето од салата отстранило две лица.
„Може да ме навредуваат како играч, но расизмот, имитирање на мајмунски крици, нема да го толерирам. Тоа е тажно и такво однесување нема место во спортот“, изјави Шредер по победата на Германија со 107-88.
Неговиот став го поддржа и сопругата Елен преку социјалните мрежи, која порача дека дел од литванските навивачи треба да се срамат поради своето однесување.
Расистичкиот инцидент остро беше осуден и од Меѓународната кошаркарска федерација (ФИБА), додека играчите на Литванија и нивната кошаркарска федерација му упатија извинување на Шредер.
Германија, актуелен светски првак, на Евробаскетот досега забележа убедливи победи против Црна Гора, Шведска и Литванија. Шредер веќе 12 години настапува во НБА лигата. кариерата ја започна во Атланта хоукс, а потоа промени уште осум клубови. Во јули годинава потпиша за Сакраменто кингс, каде ќе ја започне новата НБА сезона.
