Крис Бош имаше одлична кариера во која освои две титули во НБА-лигата, во периодот кога беше дел од славното трио со Леброн Џејмс и Двејн Вејд во Мајами хит. Ова трио се распадна откако Џејмс реши да се врати во Кливленд, а тоа отвори простор за нов договор на Бош.
Сепак, по олстар-мечот во 2015 година започнаа здравствените проблеми за Бош. Му беше дијагностицирано згрутчување на крвта во белите дробови и затоа од февруари до крајот на сезоната мораше да паузира.
Бош се врати на теренот на почетокот на следната сезона, заигра одлично, но за време на Олстарот во 2016 година повторно му се вратија истите здравствени проблеми, па од 9 февруари 2016 година веќе никогаш не се врати на теренот.
Во 2017 година и официјално беше отпуштен од Мајами, а во 2019 година се обиде да се врати на теренот, но тоа беше безуспешно. Откако беше отпуштен во Мајами, прими вкупно 120 плати, а последната му беше сега исплатена во вредност од 434.393 долари. Вкупно за овие пет години, Бош од Мајами доби неверојатни 52,1 милиони долари а не играше воопшто.
