Новиот селектор на фудбалската репрезентација на Македонија, Гоце Седлоски, се уште го нема објавено списокот со повикани фудбалери за мартовскиот бараж против Данска, а очекувањата се дека тоа ќе го стори веќе во понеделник.
И додека јавноста го чека списокот со кои фудбалери ќе им се спротивставиме на Данците, веќе се знае дека дебитантот Фетаи, како и Рамадани, се двајцата фудбалери од Шкендија кои ќе добијат повик. Повратник ќе биде и Љупчо Дориев, а за тоа се пофалија од неговиот клуб, Согдијана, на социјалните мрежи.
Очекувањата се дека освен Фетаи, дебитанти ќе бидат и Мусовски од Сиетл, Херера од Борац Бања Лука, но и двоецот од Вардар, голманот Талески и бекот Јанкулов.
Од актуелниот лидер на прволигашката табелата, според шпекулациите, ќе има најмногу репрезентативци, па освен Талески и Јанкулов, повик од селекторот Седлоски ќе добијат и Бабунски, Велковски и Николов, кој заедно со Стефан Ристовски ќе бидат повратници.
Секако, костурот на националната селекција останува ист, па неизоставен дел се и стандардните репрезентативци Димитриевски, Елмас, Барди, Алиоски, Миовски, Чурлинов …
Натпреварот со Данска се игра на 26-ти март во Копенхаген.
