Жељко Обрадовиќ и Партизан и официјално се разделија, откако белградските „црно-бели“ со официјално соопштение се огласија и потврдија дека тренерот останува на својата одлука да се повлече.
Во продолжение комплетното соопштение на Партизан.
„Досегашниот тренер на ‘црно-белите’ остана при одлуката да не ја повлече својата оставка, поради тоа што не се гледа себеси во работа со актуелниот тим, како и поради влијанието што секојдневната работа на ова ниво го има врз неговото здравје. Извршниот одбор на КК Партизан во текот на изминатите два дена одржа низа состаноци и консултации, а потоа во петок и состанок со тренерот Жељко Обрадовиќ на тема негово останување во клубот, на позицијата шеф на стручниот штаб на првиот тим.
На тренерот Обрадовиќ му беше дадена целосна и недвосмислена поддршка да продолжи со работа и да ги преземе сите неопходни чекори за ‘црно-белиот’ тим да ја надмине моменталната криза во играта и резултатите.
По состанокот, а потоа и по уште неколкуте дополнителни обиди на претседателот Остоја Мијаиловиќ и членовите на Извршниот одбор да го придобијат Обрадовиќ да ја промени својата одлука, досегашниот тренер на ‘црно-белите’ остана при ставот да не ја повлече оставката, бидејќи не се гледа себеси во работа со актуелниот тим, како и поради влијанието што секојдневната работа на ова ниво го има врз неговото здравје.
Состанокот меѓу Жељко Обрадовиќ и членовите на Извршниот одбор на КК Партизан траеше повеќе од два часа, со отворена дискусија за сите проблеми и можни решенија. И покрај низа конструктивни предлози кои подразбираа и можни резови во тимот, Жељко Обрадовиќ, со благодарност за сите изразени зборови на поддршка, не ја промени својата одлука и повеќе нема да ја извршува функцијата прв тренер на ‘црно-белите’. Кошаркарското и симболичкото значење на Жељко Обрадовиќ за Партизан и за кошарката на глобално ниво е немерливо. Празнината што останува тешко дека може да биде надоместена. Вратите на Партизан засекогаш ќе му бидат отворени, а Партизан ќе биде негов дом.
По новонастанатата ситуација, за почетокот на следната недела е закажана седница на Управниот одбор на КК Партизан, со тема поставување нов спортски директор и стратегија за работата на спортскиот сектор, по што ќе биде одржана и прес-конференција.
Времето и местото на прес-конференцијата дополнително ќе им бидат соопштени на претставниците на медиумите.“ – се вели во соопштението на КК Партизан.
