Без наслов - Страница 10025

Македонија за пласман на ЕП2020 ќе добие премија од дополнителни 1,5 милиони евра

-

10.10.2018

Дебитантското издание на новотo натпреварување под „капата“ на УЕФА, Лигата на нации не ги исполнува првичните очекувања. Добар дел од силните репрезентации решија на дуелите од ова натпреварување да не играат со најдобри состави. Еден од најдрастичните примери е тоа што Кристијано Роналдо откажа да биде дел од португалската репрезентација.

УЕФА воопшто не е задоволна што ѕвездите го бојкотираат натпреварувањето, па затоа реши со нов финансиски мотив да се обиде да ги врати и да покаже дека овие дуели не се нималку исти како пријателските. Европската куќа на фудбалот реши да го зголеми наградниот фонд и за дури 50 отсто.

Зголемување ќе има за секоја фаза од натпреварувањето, а победникот во Д сегментот, каде што е и Македонија, вкупниот бонус што УЕФА ќе го даде е зголемен за 1,5 милиони евра. Најголеми се бонусите за селекциите кои се во сегментот А, каде вкупниот бонус од УЕФА за победникот ќе биде 10,5 милиони евра.

За разлика од Лигата на нации, на пријателските дуели, УЕФА не дели никакви бонуси, па сите селекции треба да ја увидат разликата и да сфатат дека ова е натпреварување од кое може добро и да се заработи.

Македонија моментно е прва во својата група со шест бода од два меча, а репрезентативците моментно се на подготовки за дуелот против Лихтенштајн кој на 13 октомври ќе се игра на арената „Филип Втори“ во Скопје.

Федерер со победничко враќање

Трајан Маневски

-

10.10.2018

0

Светскиот рекет број 2, Роџер Федерер, со победа го започна турнирот од серијата Мастерс во Шангај. Швајцарскиот тенисер со 6:4, 4:6 и 6:4 го победи Даниел Медведев од Русија, во второто коло.

Медведев се наоѓаше во одлична форма, откако минатата недела триумфираше на турнирот во Токио, но сепак не можеше да се справи со искусниот Федерер, кој за прв пат се најде на еден турнир по завршување на САД Опен.

По оваа победа над Медведев, Роџер се пласираше во осминафиналето на турнирот, каде за противник ќе го има Роберто Баутиста Агуст. Шпанецот си обезбеди меч против Федерер, откако со 3:6, 6:4, 6:1 го победи квалификантот Макензи Мекдоналд од САД.

Не бил само Нејмар со таа мака да бега од „сенката“ на Меси и Суарез

Трајан Маневски

-

10.10.2018

0

Еден од оние играчи кои блеснаа сезонава дефинитивно е Пако Алкасeр. Тоа е играчот кој направи трансфер во Борусија Дортмунд и сега е прв стрелец во Бундес лигата. Да биде уште поневеројатно, Алкасер ниту еден меч не го започна како стартер, туку влегува како резерва и се покажува како клучен играч на тимот кој е лидер во Германија.

За вкупно 81 минута поминати на трените во Германија, Пако има дадено шест погодоци, односно во просек погодува на секои 14 минути. Напаѓачот покажа дека има сјајни реализаторски способности, нешто што не можеше да дојде до израз за време на неговиот престој во Барселона. Алкасер уште е играч на Барселона, кој игра кај „милионерите“ како позајмен фудбалер. Самиот напаѓач откри зошто решил да си замине од шпанскиот првак.

„Во текот на летото донесов одлука да заминам во некој друг клуб каде што конечно ќе може да играм. Изборот беше на Борусија Дортмунд. Не ми остана ништо друго освен да си заминам. Морав да избегам од тимот каде што се Меси, Суарез и Кутињо. Тоа се играчи со светска класа и кои пред мене имаат предност во Барселона. Ми беше многу тешко да се надевам дека ќе играм покрај нив на теренот“, открива Алкасер.

Шпанецот додава дека во Борусија бил одлично пречекан и дека тоа е неговиот најдобар потег во кариерата.

„Од првиот ден во Борусија одлично сум прифатен и навистина мислам дека направив најдобар можен потег. Не го познавам јазикот, но сите соиграчи ми помагаат, за било што и да ми затреба“, вели Шпанецот, кој освен шесте гола во Бундес лигата, еднаш погоди и во Лигата на шампионите на дуелот против Монако.

Голот на Марсијал против Њукасл го чинеше Манчестер осум милиони евра

Трајан Маневски

-

10.10.2018

0

Манчестер јунајтед на спектакуларен начин успеа да направи пресврт и да стигне до победа против Њукасл, во последното одиграно коло од Премиер лигата. „Црвените ѓаволи“ губеа со 0:2 по само 10 минути игра и така беше се до 70 минута. Во последните 20 минути од средбата, Манчестер направи целосен пресврт и стигна до триумф од 3:2.

Најпрво Хуан Мата погоди за 1:1, потоа Ентони Марсијал израмни на 2:2, а Алекс Санчез со голот во 90 минута погоди за 3:2 и голема радост на навивачите на „Олд Трафорд“. Победата значеше и останување на Мурињо на клупата на најтрофејниот англиски клуб. Интересно е што победата, односно голот на Марсијал донесе и една лоша вест за Манчестер.

Англискиот гигант ќе треба да исплати осум милиони евра на Монако, клубот од каде што пристигна Марсијал. За Французинот беа платени 50 милиони евра, но трансферот може да достигне и фантастични 80 милиони евра, доколку се исполнат сите бонуси.

Токму еден таков бонус е постигнувањето на 25 погодок на Марсијал во Премиер лигата. Во клаузулата стои дека Манчестер ќе треба да исплати осум милиони евра, ако Французинот стигне од доаѓањето на „Олд Трафорд“ во 2015 година, па се до крајот на оваа сезона, стигне до 25 погодоци во првенството. Токму погодокот против Њукасл беше тој 25 погодок на кој најмногу се израдуваа во Монако.

Вардар е на 144-тото место на сите времиња, тронот е за Реал Мадрид

Трајан Маневски

-

10.10.2018

0

Најтрофејниот македонски клуб Вардар е на 144-тото место на вечната листа на УЕФА во елитното натпреварување. Од 1955 година започна натпреварувањето познато како Куп на европски шампиони, а речиси пред три децении тоа беше преименувано во Лига на шампиони.

За сите овие години, Вардар вкупно осум сезони настапувал и има одиграно 24 мечеви. „Црвено-црните“ вкупно пет пати се радувале, осум пати било нерешено, а 11 средби ги имаат загубено. Вкупно имаат дадено 30 погодоци, а примено 40 гола.

Работнички на оваа листа е на 185-тото место. „Романтичарите“ имаат 14 средби, а се радувале три пати. Шест дуели одиграле нерешено, а загубиле пет. За Шкендија е резервирано 296-тото место. Тетовци во две сезони имаат одиграно осум средби и се со биланс од две победи, едно реми и пет порази. Веднаш зад Шкендија е некогашна Слога Југомагнат, додека Силекс е на 338-мото место на листата.

На врвот на листата е најтрофејниот. Реал Мадрид со 49 сезони учество во елитното натпреварување е и најуспешен. Веднаш зад Кралскиот клуб е Баерн Минхен, а третото место ѝ припаѓа на Барселона. Во топ 10 има место и за Манчестер јунајтед, Јувентус, Милан, Бенфика, Ливерпул, Порто и Арсенал.

Платил 175 фунти за такси до Риека за да гледа фудбал, а на мечот забранета е посета

Томас Ѓорѓиевски

-

10.10.2018

0

Хрватската фудбалска репрезентација за првпат по пласманот во финалето на Мундијалот ќе игра натпревар на домашен терен. Дуелот во рамките од Лигата на нациите против Англија, кој е закажана за во петок, ќе се игра во Риека, пред празни трибини, поточно забранета е посета на натпреварот.

Ваквата информација за оваа реприза од мундијалското полуфинале во Русија не стигнала навреме до еден англиски фудбалски фанатик, Џејмс Монкс, кој патува на секој гостински натпревар на англиската селекција. Тој го испланирал патувањето и трошоците околу тоа, а откако слетал во Загреб, се утапил кон Риека и потрошил 175 фунти за такси-превоз само за да стигне до градот каде што ќе гостува неговата Англија.

Оваа забрана за влез на навивачи на натпреварите кои ги игра репрезентацијата не е новитет во Хрватска. Фудбалската селекција веќе петти меч ќе игра без поддршка од трибините, а забраната е поставена поради инцидентите создадени од страна на хрватски навивачи групи кои се случија пред неколку години.

И покрај тоа, дваесет и петгодишниот Џејмс Монкс се надева дека ќе најде начин да го гледа овој натпревар, пред да се утапи за Севилја, каде што Англија треба да одигра меч против Шпанија.

„Само сакам да си ја пробам среќата, да се обидам да го гледам мечот на овој или на оној начин. Ако имам среќа, тогаш супер, но најпрво мора да направам сè што е во моја моќ за воопшто да имам среќа. Ќе биде незаборавно патување, без разлика дали ќе успеам да го гледам натпреварот“, истакна Монкс.

Натпреварот Хрватска – Англија е закажан за 12-ти октомври, петок, со почеток во 20.45 часот.

„Штрковите“ летнаа кон Словенија

Златко Јуруковски

-

10.10.2018

0

По одличниот старт во втората АБА-лига и поразот од Блокотехна во првата македонска лига, за МЗТ Скопе Аеродром утре од 18 часот следува тешко гостување во Копер кај Сикст Приморска. И Приморска извојува две победи во првите две кола и важи за еден од фаворитите за титулата во регионалното натпреварување.

„Штрковите“ попладнево со авион заминуваат за Љубљана, од каде што ќе се упатат кон Порторож, каде што ќе бидат сместени, а вечерва ќе тренираат во салата „Бонифика“, во која во 2013 година се играше и една група од Евробаскетот за мажи.

Еден од најдобрите играчи на Приморска е Иван Маринковиќ, кој пред неколку сезони беше во дресот на МЗТ, прв стрелец им е Марко Јагодиќ Куриџа, а таму се и Жан Марк Шишко и Лука Вончина, кои во минатата сезона играа заедно со Љубомир Младеновски во Илирија.

Пренос од натпреварот ќе има на телевизијата Арена 2.

„И ние и тие атакуваме на самиот врв на табелата. На првите два меча функциониравме како што треба, но имаме уште многу простор за напредување, ова уште е почетна фаза од сезоната. Мора да бидеме агресивни, да не му дозволиме на противникот да диктира свој ритам. Верувам дека можеме да победиме“ – рече плејмејкерот Лестер Медфорд.

„Трагичарот“ на Италија седна на клупата на Киево

Томас Ѓорѓиевски

-

10.10.2018

0

Поранешниот селектор на Италија, Џампјеро Вентура, официјално е назначен за нов тренер на Киево откако Лоренцо Д‘Ана вчера доби отказ од управата на калчолигашот. Вентура се согласи на двегодишна соработка со „летечките магариња“.

Седумдесетгодишниот стратег беше без ангажман откако не успеа да ја однесе Италија на Светското првенство во Русија, „аѕурите“ за првпат по половина век не учествуваа на еден Мундијал. Последната клупска работа му беше во Торино, како предводник на „биковите“ од 2011 до 2016 година.

Вентура го очекува исклучително тешка задача бидејќи Киево сезонава уште нема остварено победа по осум кола во Серија А.

Ги нема Меси, Роналдо, Лева, тука се Стуани, Пјонтек, Пако

Златко Јуруковски

-

10.10.2018

0

Ако се навикнавме први стрелци во најсилните лиги да бидат Меси, Роналдо, Кејн, Салах, Левандовски, сезонава сликата е изменета, па на чело се не толку скапи играчи, или примерот во Англија каде што најефикасен е играч од средниот ред, а не напаѓач.

Неочекувана е листата на најдобри голгетери. Во Шпанија, најефикасен е Кристијан Стуани од Жирона, 32-годишен Уругваец познат како близок другар на Кавани.

Иако во Ла Лига играат и Меси, Диего Коста, Гриезман, Суарес, Бејл, Бензема, засега Стуани ги засени. Зад Стуани е Андре Силва од Севилја, каде што игра како позајмен од Милан, а на дебито во шпанската лига постигна хет-трик.

Во Италија, прв стрелец е Кжиштоф Пјонтек, кој летоска во Џенова дојде за 4 милиони евра. Девет гола на седум меча за Полјакот е старт од соништата во Серија А.

Пако Алкасер во дресот на Борусија Дортмунд даде шест гола за 81 минути игра и засега има двојно повеќе голови од Роберт Левандовски, кој е фаворит за признанието прв стрелец.

Во Премиер лигата, Еден Азар од асистент, се претвори во гол-машина. Азар редовно ги тресе мрежите и засега во грб му гледаат Агуеро, Кејн, Салах и останатите голгетери. Во минатата сезона Азар даде 12 гола, а сега по осум кола, веќе има седум голови.

Вертонген два месеци надвор од терените

Томас Ѓорѓиевски

-

10.10.2018

0

Тотенхем никако да одигра еден натпревар сезонава со комплетен состав. Јан Вертонген е новиот играч од редовите на „петлите“ кој ќе паузира одреден период поради повреда. Белгискиот дефанзивец го повреди бутниот мускул, а според последните медицински прегледи, се претпоставува дека ќе паузира повеќе од шест недели.

Повредата ја заработи пред десетина дена на мечот против Хадерсфилд, што го спречи дефанзивецот да настапи против Барселона во Лигата на шампионите и против Кардиф изминатиов викенд.

Белгиецот е еден од низата првотимци на Тотенхем кои не се достапни за Покетино, покрај Али, Дембеле, Орие, Роуз и Ериксен, а предводникот од меч за меч го крпи тимот.

Оваа повреда го спречи Вертонген да се стави на располагање кај селекторот на белгиската репрезентација, Роберто Мартинес, за следните натпревари против Швајцарија во Лигата на нациите, а потоа и против Холандија во мечот од пријателски карактер.