Организаторите на Летните олимписки игри кои во 2024 година треба да се одржат во Париз, го открија спектакуларниот план за отворање на Игрите. Амбицијата на организаторот е да се направи парада долга шест километри на која ќе дефилираат спортистите и тоа во бродови што ќе пловат низ реката Сена.
Идејата е тоа да биде најголемата смотра во историјата на Игрите, а покрај реката ќе може да има неверојатни 600.000 луѓе кои ќе ги поздрават спортистите.
Планот е да има дури 160 бродови на кои ќе бидат распоредени спортистите, а спектакуларен перформанс треба да има и на брегот.
Потоа сите заедно од реката Сена ќе продолжат кон плоштадот што се наоѓа во близина на Ајфеловата кула и таму би се одржал завршниот дел од церемонијата на отворањето на Игрите.
„Тоа ќе биде најголема церемонија на ЛОИ. Можеби ова не е најлесниот начин да се организира едно отворање на ЛОИ, но наша обврска е да бидеме амбициозни. Тоа ќе биде почеток на Игрите и пораката која ќе биде испратена треба да биде силна и едноставна. Милијарди луѓе ќе го гледаат тоа. Сакаме сите да го почувствуваат најдоброто што Франција го има. Тоа ќе биде едноставна комбинација на спорт и култура, а целиот град ќе биде претворен во Олимписки стадион“, објасни претседателот на организицискиот одбор на ЛОИ 2024 година во Париз, Тони Естан.
