Новиот сопственик на Челзи, Тод Боели, подготви пакет од 200 милиони фунти за засилувања во летниот преоден рок, а веќе се знае и планот со пет имиња со кои англискиот премиерлигаш би си ги исполнил желбите и плановите за ова лето.
Примарна цел е да се ангажираат Матајс де Лихт, стоперот на Јувентус, и за него Челзи има план да понуди 60 милиони фунти и плус во пакет во Торино да замине италијанскиот репрезентативец Жоржињо.
Во Лондон би дошол уште еден стопер, а Челзи е заинтерсиран за Калиду Кулибали од Наполи и за него подготвена е понуда од 30 милиони фунти.
Интересно е што на листата на желби е и Стефан Савиќ од Атлетико Мадрид, кој исто така е стопер.
Тој е поевтин и е резервна варијанта, а би чинел 25 милиони фунти, плус во понудата е Емерсон, уште еден репрезентативец на Италија, кој би заминал во Атлетико Мадрид.
За Челзи е многу важно да го купи Рахим Стерлинг, а се надеваат дека понуда од 45 милиони фунти за Манчестер сити би била прифатлива.
Имаат уште едно офанзивно решение како засилување, а тоа е бразилецот Рафиња од Лидс, за кого би понудиле 55 милиони фунти, но тука проблем е што тој според англиските медиуми, не сака да остане во Премиер лигата, туку сака да игра за Барселона.
