По завршувањето на финалето на Купот во ракомет помеѓу Вардар 1961 и Еурофарм Пелистер во Охрид, се случи сериозен инцидент кога еден полицаец го удри македонскиот репрезентативец Филип Талески со пендрек по глава.
Министерството за внатрешни работи (МВР) објави дека поднесена е кривична пријава против Х.Р. поради постоење основи на сомневање дека сторил кривично дело „малтретирање во вршење на службата“ по член 143 став 1 од Кривичниот законик.
„Одделот за внатрешна контрола, криминалистички истраги и професионални стандарди до Специјализираното одделение за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење организиран криминал и корупција – Скопје поднесе кривична пријава против Х.Р., вработен како полициски службеник во полициска станица на подрачје на СВР Охрид, поради постоење основи на сомневање дека сторил кривично дело „малтретирање во вршење на службата“, по член 143 став 1 од Кривичниот законик. Имено, пријавениот на 13.05.2023 година, околу 20 часот во Спортската сала „Билјанини Извори“ во Охрид по завршување на ракометен натпревар, при вршење на службата со умисла извршил малтретирање врз оштетениот Ф.Т. на начин што неосновано и прекумерно употребил средства за присилба врз него. Одделот за внатрешна контрола, криминалистички истраги и професионални стандарди, како овластен предлагач, против Х.Р. ќе покрене постапка за утврдување на дисциплинска одговорност, а работникот ќе бидат суспендиран од работа до завршување на дисциплинската постапка”, се вели во соопштението на МВР.
