Селекторот на Босна и Херцеговина, Роберт Просинечки, по втор пат само за десетина дена мораше да оди на операција. Откако му беше направен хируршки зафат на тенкото црево, морало повторно да се интервенира и повторно заминал „под нож“.
Според изјавите на лекарите, Просинечки добро се чувствува и неговата состојба е стабилна. За разлика од првата операција, за која веднаш се дозна, оваа била направена уште во саботата, а информациите се појавија дури денеска.
Просинечки првпат се пожалил на болки во стомакот по враќањето од гостувањето кај Шпанија во Лас Палмас, во пријателскиот меч на БиХ на 18-ти ноември. Неколку дена подоцна беше хоспитализиран и му беше направена првата операција.
Просинечки засега е сместен во одделот за интензивна нега, а сигурно ќе остане во болница уште неколку дена.
