Некогашната ѕвезда на Манчестер јунајтед, Вејн Руни, продолжи со конфронтацијата со Кристијано Роналдо. Руни и КР7 беа соиграчи во Манчестер и заедно освоија седум трофеи со Црвените ѓаволи, но во моментов односите не им се добри.
Целиот конфликт започна со коментар на Руни кога гостуваше во „Скај спорт”. Актуелниот тренер на Дерби каунти изјави дека враќањето на Роналдо во Јунајтед не го дало очекуваниот резултат и дека тимот има потреба од помлади и амбициозни фудбалери.
Португалецот одговори на „Инстаграм“ со коментар: „Двајца љубоморни”, мислејќи на Руни и Џејми Карагер, кои исто така често го критикува.
Денеска Руни додаде масло на огнот.
„Го видов коментарот на Роналдо. Би рекол дека нема фудбалер кој не му завидува на Кристијано за кариерата, трофеите, парите, славата. Сите играчи му завидуваат, освен Лионел Меси”, рече Руни.
