Тренерот на Јувентус, Маурицио Сари, се надева дека ќе може да си ја изврши обврската и да биде на клупата за дербито против „неговиот“ Наполи. Откако му беше дијагностицирана пневмонија, Сари замина на терапија и не беше во можност да ја предводи Старата дама на отворањето на сезоната против Парма. Беше најавено дека ќе го пропушти и дербито против Наполи, но кај Сари се појавија знаци на подобрување.
Здравјето на италијанскиот стратег се подобрува побрзо од очекуваното, а до петок ќе се знае дали лекарите ќе му дадат зелено светло да се врати на работа. Сари и вчера бил во тренинг-центарот на Јувентус, каде што одвоил време да се дружи со фановите, давајќи автограми и селфи спомени.
Доколку се појави на „Алијанц стадионот“ во сабота, на Сари ќе му биде прв меч против Наполи откако ја напушти клупата во летото 2018 година.
