Еден од најлегендарните стадиони во светот, „Олд Трафорд“ во Манчестер, може да биде срушен. Ова се најавите од Англија за култниот стадион кој постои веќе 112 години и е дом на еден од најпопуларните клубови во светот, Манчестер јунајтед.
Рушењето е спомнато како една од драстичните мерки кои може да се преземат за да биде направен помодерен дом за Црвените ѓаволи.
Предноста за Манчестер е тоа што во сопственост на клубот се наоѓа доволно простор во околината на стадионот, па нема да биде проблем да се сруши и на истото место да се изгради поголем и помодерен стадион.
Сепак, проблемот е каде би играл Манчестер како домаќин додека се гради стадионот. Тотенхем и Арсенал играа на „Вембли“ во Лондон додека ги градеа новите стадиони, но во северозападниот дел на Англија нема доволно голем стадион на кој Манчестер јунајтед би играл како домаќин. Во градот има само уште еден голем стадион, но тој е дом на нивниот голем ривал Сити и Граѓаните сигурно нема да дозволат да го делат стадионот со градскиот соперник.
Друга опција е да се изгради нова трибина или да се прошири јужната трибина, позади која има железничка пруга. Во тој случај, капацитетот на стадионот ќе биде зголемен и „Олд Трафорд“ ќе може да добере 80.000 гледачи, што е речиси 5.000 повеќе од сегашниот капацитет.
