Екипата на Шкендија Арачиново останува лидер на табелата во Втора фудбалска лига на Македонија, откако со 2:0 славеше против Каменица Саса во меч од 15 коло. Ова беше само еден од двата меча кои се одиграа денеска во второто по ранг натпреварување кај нас. Дури пет средби беа одложени поради лошите терени на кои немаше услови за нормално играње, па тие ќе се одиграат во пролетниот дел.
Шкендија Арачиново во седмиот меч пред своите навивачи стигна до шестата победа и тоа на рутински начин. Домаќините погодија по еднаш во двете полувремиња и не му дадоа шанса на гостинот да се понадева на изненадување.
На табелата, веднаш зад Шкендија А. е Брегалница Штип која лесно со 4:0 славеше во Прилеп против Победа. Штипјани уште во првото полувреме постигнаа два гола, а потоа во вторите 45 минути следуваа уште два погодоци во мрежата на прилепчани.
Брегалница сега има 33 бодови, само два помалку од лидерот Шкендија А. Победа остана на 11 бодови и е на 12 место на табелата, што значи и опасност за испаѓање.
