Шведска ја совлада Белорусија со убедливи 87-59, забележувајќи ја првата победа во прет-квалификациите за ЕП 2021. За Швеѓаните ова беше последен меч во оваа година, веќе во февруари ги очекува дуел против лидерот Данска во групата А.
Хакансон со 21 поен и шест асистенции ги предводеше домаќините, додека од составот на Белорусија со по 13 поени се истакнаа Садлер и Кадраутсау.
Австрија со конечни 96-82 беше подобра од селекцијата на Велика Британија. Австријците ја остварија втората победа во групата Д, па веќе во следниот дуел против Кипар можат да го обезбедат местото во квалификациите за Евробаскетот 2021.
Ландесберг постигна неверојатни 49 поени, поточно половина од вкупните поени на австриската селекција, а во својот учинок додаде и 10 скока. Кај поразените, Хенсон беше најефикасен со 18 поени.
Белгија славеше на гостувањето кај Исланд со конечни 79-66. Белгијците така ја запишаа втората победа од исто толку меча во групата Ц.
