Барселона го победи Атлетико Мадрид со 0-1 на гостински терен и на големо задоволство на фудбалскиот свет се пласира во финалето од шпанскиот Куп, каде што за противник ќе го има Реал Мадрид. Тренерот на Атлетико Мадрид, Диего Симеоне, беше искрен на прес-конференцијата и призна дека Каталонците биле подобар противник, но вели и дека неговата екипа не одиграла воопшто лошо.
„Не одигравме добро во првото полувреме, но не беше толку лошо за да мора да се извинуваме. Во фудбалот има моменти кога противникот е подобар, но во вториот дел бевме одлични и можевме да израмниме. Не може да очекувате дека против Барселона ќе ја контролирате играта. Мора да ја прифатиме реалноста и да продолжиме да се бориме. Сега целосно ќе се фокусираме на Ла Лига, од петок започнуваме да размислуваме на дуелот против Севиља. Атлетико е во подем, успеавме да привлечеме одлични фудбалери. Барселона можеше да постигне повеќе голови, но ние одговоривме храбро. Тие се одличен тим и ми се допаѓа како играат. Бевме конкурентни на сите четири меча против нив оваа сезона. Имавме одлични моменти, па се надевам дека ќе ја завршиме сезоната на најдобар можен начин“, рече Симеоне.
Финалето на Шпанскиот куп помеѓу Барселона и Реал Мадрид ќе се одигра на 26 април во Севиља.
