Новото засилување на Ливерпул, Уго Екитике, игра одлично на стартот од новата сезона, но направи глупост на мечот од англискиот Лига куп против Саутхемптон, кога во 85-тата минута го постигна победничкиот гол, а потоа го соблече дресот за да прослави, но заборави дека веќе има жолт картон и беше исклучен.
Британските медиуми најавија дека Црвените ќе го казнат две неделни плати, или околу 570.000 евра, но Арне Слот сега ги демантира тие пишувања и вели дека нема да има казна за францускиот интернационалец.
„Не доби казна. Тоа што го направи не беше паметно, но веднаш им се извини на соиграчите. Тој е млад, а играчите од сите возрасти може да направат грешка. Сите правиме грешки и во овој клуб е дозволено и да погрешите без веднаш да бидете казнети. Екитике е прекрасен човек и мислам дека сите во клубот би го вброиле помеѓу тројцата најпристојни со коишто работиме. Дури и да не е така, дозволено му е да погреши. Не беше тоа паметен потег, но во вторникот тоа не нѐ чинеше, но може да нѐ чини утре. Позитивна работа е што Федерико Кјеза одлично се покажа, па можеби ќе добие поголема минутажа во моментов кога Уго не ни е на располагање“, рече Слот.
Екитике поради црвениот картон против Саутхемптон доби суспензија од еден меч и нема да биде во комбинација за утрешниот натпревар против Кристал палас.
