Менaџерот на Ливерпул, Арне Слот, изрази разочарување по првиот пораз на тимот во Премиер лигата оваа сезона, посочувајќи ги проблемите во одбраната при статични позиции.
Црвените загубија со 2-1 на „Селхрст Парк“ од Кристал Палас, откако Исмаила Сар и Еди Нкетија искористија корнер и долго додавање, прекинувајќи го перфектниот старт на Ливерпул.
И покрај тоа што голманот Алисон Бекер беше најдобар играч на тимот, дефанзивата на Ливерпул страдаше цел натпревар. Слот посочи дека проблемите со статичните позиции веќе не се случајни.
„Минатата сезона тоа беше едно од нашите најсилни оружја, а сега примивме по два гола против Њукасл и Кристал Палас. Во оваа лига статичните позиции стануваат сѐ поважни, и ако сакаш да се бориш на врвот, мора да имаш позитивен баланс во нив.“
Тој исто така потенцираше дека погодокот на Нкетија во последните моменти е тежок за прифаќање, но фер поради дополнителното време.
„Секогаш е тешко да примиш гол во завршницата, но имаше и замена, па дополнителната половина минута беше оправдана. Мора подобро да се браниме при долгите додавања и да учиме од вакви натпревари“, истакна менаџерот на Ливерпул.
